小me又要見醫生喇

唉.....星期六幫小me搣膠布，個傷口又腄左。CEO摸完話唔同上次嘅腄法，今次係硬硬地（上次係冧冧），唔似係爆傷口，可能係敏感。不過我真係好驚佢爆傷口呀，所以尋晚成晚都訓唔著，今朝一早就打去診所約Elain醫生，起碼等醫生check下咩事丫麻。今日我有同事放假所以我唔可以放，於是就由CEO帶小me去診所。CEO 12點見完醫生打俾我，話小me可能傷口又爆左，Elain醫生話會check清楚原因，點解小me今次咁乖乖都會腫左。我聽到小me又要拆開個傷口俾醫生檢查，我真係忍唔住喊喇，對唔住呀小me，婆婆保護唔到你，我真係好心痛好心痛呀。同事同朋友都叫我唔好擔心....唉.....點可以唔擔心丫，點解做個絕育手術要開三次刀丫？不過我覺得唔關Elain醫生事嘅。

頭先三點幾Elain醫生打俾我，話原來佢入面冇爆傷口，係小me對手術D線敏感，皮膚同肌肉之間有膿，同佢放左D唔好嘅野出黎，依家個傷口要縛住條喉，因為如果佢又有膿就可以有個位放到出黎。要食抗生素同埋會教我地點幫佢清傷口，五日後返診所拆左條喉......我問醫生，會唔會俾小me留院幾日好D呢？我怕我地唔識點照顧佢。醫生話可以一陣我地黎接佢果時，佢講解完我地先再決定。

小me，今次你好乖乖架，唔關你事，係條線線唔乖，搞到小me又要痛痛。婆婆依家黎診所喇，可能要你留院幾日俾醫生照顧你，但婆婆頭先特登去左買你最鍾意飲嘅羊奶粉，等你好返沖俾你飲架。