Mini me與眼藥水

小me嘅眼仔雖然已經好得七七八八，但都要keep住一日兩次滴眼藥油（冇錯，係油黎嘅）。不過支油應該係有少少澀眼嘅，所以佢好鬼憎滴依支野，次次一見我準備幫佢滴眼仔，佢就會以9秒9嘅速度衝入床下底。

而每次滴完之後，以下嘅失常事件就會發生........................

結論：

1. 小me真係好憎滴眼藥油。

2. Muffin以為床仔下面收埋左野食。

3. Charcaol有感而發：依隻癲野........真係我生架？

夏日炎炎

我地八哥最怕熱架嘞，家下天時暑熱，真係連喺屋企都怕會中暑呀

↑Charcaol：阿女，大熱天時唔想郁呀，不如一齊坐下按摩椅啦，好似話震震下都可以減肥架

↑Mini me：媽咪....但係張椅D皮都幾熱下喎......

↑Muffin：我又坐我又坐！加埋我加埋我！

↑Mini me：哥哥，你擋住個鏡頭影唔到我喇，我個頭要伸高D....再高D！

↑Charcoal：我點都唔會郁架喇........

↑皮蛋：你地班傻仔~~~天氣咁熱，緊係霸住塊散熱板黎訓啦

↑Charcoal：夏天最好享受一下日光浴，你地睇下我D膚色幾健康！

↑皮蛋：我想曬黑條脷......

↑性感豬唇Mini me

拆線完成

約左尋日1pm去診所幫小me拆眼角膜果D線線，因為要麻醉，所以早上開始佢就唔可以食野同飲水，於是大清早就不斷叫佢唔好玩得咁癲同埋唔好周圍lam，唔好嘥晒D口水。拆埋依D線，小me眼仔嘅手術就可以叫做完滿結束。1pm抵達診所，例牌咁多人等緊，不過今日好好彩，好多狗狗都只係黎打針針，所以到1:30pm就到我地嘞。今次周醫生終於冇話小me醜樣喇，不過就話佢肥囉...話同佢屋企隻八哥差唔多肥咯。周醫生話今日都幾多野做，所以大約6pm先幫到小me拆線，不過佢會盡量早D幫小me做。姑娘抱左小me上樓上等做手術，我地就返屋企等醫生嘅通知。

5pm診所就打黎話可以接返小me喇，果時係黃色暴雨警告，超級落狗屎呀。CEO話咁大雨，佢一個人去接小me好喇，不過我死都唔制，因為次次我都去接佢架麻，今次點可以例外喎，於是我地就一齊去接小me嘞。去到診所，姑娘喺樓上抱返小me落黎俾我地，陰功豬.....麻醉藥力未過，所以仲係好累好懵盛盛咁，帶佢返屋企果時，佢好乖好安靜咁訓喺袋袋入面，CEO話如果佢平時都係咁乖就好喇。

返到屋企，Charcoal佢地猛咁聞小me，因為小me仲係好累，所以就抱佢上床安安靜靜咁訓下。小me之前兩次手術後都要留院一晚先可以接返屋企，所以我未見過佢累成咁，覺得好心疼呀，佢依家就好似Charcoal果時剖腹生BB返到屋企果個樣咁，又累又迷糊。Charcoal好似好擔心小me咁，不斷聞佢眼仔，我咪抱住Charcoal，解釋俾佢知小me冇事唔使擔心。真係唔好以為Charcoal平時咩都唔理唔理咁，其實佢係好關心佢兩個仔女架。

到晚上11點，小me開始精神少少喇，所以就放返佢落地地俾佢行下，佢好似依家先知道自己原來返左屋企咁，行暈晒成間屋，見佢唔去食野，於是俾左粒佢好鍾意嘅餅餅佢食，點知依粒平時1秒KO嘅餅餅，佢足足食左成分鐘先食完！可能藥力未過，佢牙仔仲係冇咩力啦。

今朝7am就俾佢地嘈醒，一清早Muffin同小me依兩條友仔已經開始玩喇，小me又好似平時咁超級精力充沛，完全冇晒事lu。

爆笑相集

↑Charcoal第一次游水......又話狗狗天生識游水嘅？

↑Charcoal：媽咪....你食完D薯條呢...可唔可以唔好放個薯條盒喺我個頭上面呀？

↑Charcoal：來吧我甚麼都應承~~~來吧我甚麼都聽命~~~

↑Charcoal：你地睇下我幾醒！

↑Charcoal：吼~~~~放我出黎呀~~~~

↑Charcoal：我個頭唔係CD player呀！唔好成日放野喺我個頭上面好喎~~

↑皮蛋睡相

↑Charcoal：我鄙視你~~~

↑Charcoal船長黎喇~~~我就係肥盜王

↑Muffin同小me睡相， Mini me：我有枕頭仔架~~

↑連體嬰

↑小me...乜你戴住喇叭都可以訓得咁衰嘅？

↑三隻矇豬眼.....Charcoal個樣超衰

↑Muffin：耶~~~我係瑪麗蓮夢露噢~~~~係咪好sexy呢？

↑皮蛋：肥蛇吐信

↑我的家.........

當年‧今日

一直都仲未喺度介紹下我果四粒寶貝，就等我今日為大家揭開佢地神秘嘅面紗啦。

首先上碟嘅係我大囡Charcoal，生於2004年6月28日地球某個角落。喺一個月黑風高嘅晚上，我同佢邂逅於旺角嘅一間黑店（冇錯....天真嘅我當時完全唔知係一間黑到冇人有嘅黑店）果時佢兩個月大，細細粒好乖巧。但原來佢乖係有原因架，我地第二日帶佢去診所做身體檢查，證實佢有狗瘟！果時好驚好驚，好驚會失去佢，但從來冇諗過拎返寵物店換過另一個，我只係要Charcoal咋。不過Charcoal佢好叻叻，大約兩三個星期後佢就差唔多好返晒喇，所以四個之中我最錫同最珍惜就係佢。

Charcoal花名「肥B」，佢好精架，學咩都好快上手，但除非有著數，否則佢係識都會扮唔識架（甚至扮聽唔到）

↑三個月大嘅Charcoal，當時大病初癒，所以仲係排骨豬一名。

↑今時今日嘅Charcoal，一個字：圓！

第二道菜就係皮蛋嘞。皮蛋出生於2005年8月25日元朗某個家庭，佢親生媽媽阿Belle都係大件一族黎架。喺皮蛋四個月大時我地帶埋Charcoal去佢屋企睇下兩個小朋友夾唔夾，皮蛋非常熱情活潑，仲不斷喺梳化跳黎跳去想同Charcoal玩添，不過Charcoal就冇乜理佢，但亦都冇話唔鍾意皮蛋囉。於是，皮蛋就成為左我地其中一個家庭成員嘞。

皮蛋花名「肥仔」，佢係好易肥架，不過依家成功減左磅，要努力Keep住喇。佢天生右手戴左隻白手襪，可能之前係做waiter架。

↑四個月大嘅皮蛋，身型已經同當時歲半嘅Charcoal差唔多，不過都仲係細細粒，超級BB樣

↑今日嘅皮蛋，眼細脷長係佢嘅Trademark

再黎嘅係Muffin同埋Mini me，佢地生於2006年9月5日，兩個都係Charcoal嘅親生骨肉。本來應該有多個哥哥架，可惜哥哥太大隻，塞住左產道令到Charcoal要剖腹生產，但哥哥可能缺氧太耐，所以救唔返咯。當時真係好驚架，我預左冇晒D BB架喇，但Charcoal千忻唔好有事呀！

Muffin 同Mini me都好叻叻，佢兩個好順利咁黎到依個世界，生命真係好奇妙好神聖！不過Mini me約十日大時成日飲奶都「濁」親，睇左幾次醫生，發現佢原來係先天性胸骨扁平。果時佢因為「濁」奶，所以要每兩小時人手用針筒餵佢飲奶，好脆弱嘅生 命....好怕自己做得唔好而失去左佢，Mini me三個多星期大就去做一個擴大佢胸骨嘅手術，好彩手術好成功，多謝周醫生幫Mini me做依個手術，令佢可以擁有一個正常嘅童年。手術後Mini me要戴住個胸模一段時間，果陣Muffin成日蝦妹妹架，Mini me一俾佢反轉就好難自己反返起身。可能Mini me好記得果段俾人恰嘅日子啦，所以當佢拆左果個模之後，佢變左牛皇妹.....成日蝦哥哥！Muffin哥哥自此變左鵪鶉，成日俾妹妹蝦返轉頭，真係因果循環....善哉善哉。

Muffin花名「finfin豬」，成日嗲聲嗲氣，俾妹妹蝦都唔會反抗。唔知點解對腳愈黎愈長，同Mini me一D都唔似同胎兄妹。

Mini me花名「小me」「豬咪咪」，典型牛皇頭，天不怕地不怕，最鍾意咬尾咬腳，持住自己細粒同埋做過兩次手術，可憐死光成功攻陷左我地嘅心，更加惡上加惡。

↑出生第一日嘅Muffin，重6.2 oz，成個波咁架，果時佢同Mini me一樣size，估唔到今日會差咁遠

↑今日嘅Muffin，空有一對小虎眉，奈何內心係柔弱非常架

↑12日大嘅Mini me，第一日開眼呀，我會帶你睇清楚依個世界架喇

↑今日嘅Mini me，都係果句：唔曳果時真係超得人錫架

你地可以去我地嘅相薄睇更多我地嘅成長歷程架 

http://flickr.com/photos/laputa

你精我都精

肥B（Charcoal嘅乳名）真係全家最精果個！頭先6點零鐘準備出街食晚飯，我拎住四支骨骨諗住逐個派俾佢地，咁我第一個一定係俾肥B先嘅（由大至細麻）。點知我不斷叫肥B肥B都冇人應，平時佢一知食骨骨一定第一時間衝出黎架麻，唔通我又困左佢喺房？（由於佢太黑，困房事件都唔係第一次發生架喇）

我打開廁所：「肥B！肥B？」；打開房門：「肥B？肥B？」；再搵床下底：「肥B！肥B！」......影都冇，亦都冇應我......點解？肥B你去左邊呀？做乜會無啦啦失蹤架？係咪俾外星人拐左呀？

當我諗住搵埋佢地間屋仔之際，CEO發現左佢嘅蹤影喇！佢.....竟然「lay」左喺大門口佢地個出街袋入面！笑死我喇，平時佢入袋一陣都會因為熱而喘晒氣架麻，今日佢為左搏懵出街，唔止冇喘過氣、甚至連有野食都忍住冇郁過！不過佢真係以為咁就可以暪天過海有得出街.....原來佢一直都唔知道，除左同佢地出街街之外，我地係唔會拎果個袋架！肥B真係精甩尾呀，仲好好忍耐力添，果然係「我的驕傲」呀。

兩黑豬出巡

尋晚返娘家食飯，本來我諗住帶Muffin同小me過去架，但偏心嘅CEO想帶Charcoal過去，於是佢無啦啦問佢地：「邊個想過去就舉手！」依個時候，Charcoal真係走埋去倚住張按摩椅舉起左一隻手！.....咁冇辨法嘞.....唯有帶Charcoal同小me過去啦。

今次係小me係一次用自己對腳行街，所以佢唔係咁敢行呀，唔知佢係咪覺得個地太「鞋」，整親佢柔軟嘅腳板呢？因為我地係用一分二果D繩黎綁佢地，Charcoal心急要行快D，但小me行幾步又唔敢行，所以Charcoal成程就好似拉住隻牛咁，我就喺側邊不斷吶喊為小me打氣。

過到娘家，佢兩個不斷飲水同爬喺地下抖涼，精力充沛嘅小me好快就回完氣周圍八卦。我Daddy媽咪都係偏心架喇，成日都只係同Charcoal玩，又話小me冇Charcoal咁得意.....雖然我都係偏心Charcoal，但我同時都咁錫另外三個架麻。

回程果時，小me竟然喺個新袋入面賴尿尿！搞到個身又濕個袋又濕連條胸帶都濕埋....於是一返到屋企就要幫佢洗白白，正一八婆仔黎架！

↑Muffin（眼有淚光）：.....頭先又話帶我去太婆屋企嘅.....？

↑Charcoal（喺中間奸笑）：傻仔黎嘅，今晚係Ladies Night，你都係留喺屋罷啦

↑Mini me（老馮兩頭fing）：冇你地咁好氣，我實有份去嘅

↑Charcoal.....你真係肥左好多呀，雖然依家你變左師奶啫，但都Keep下好D喎.....

↑小me....你個嘴唇又確係幾厚嘅......

唔知大家覺得佢兩母女似唔似樣呢？

拆線

今日約左2:30pm同小me去覆診，而Blog友Bread嘅老人家阿Bo都黎覆診，原來阿Bo好怕睇醫生架，佢緊張到口仔都震晒，又唔肯坐低喎，返到屋企佢實有排訓喇。

小me成日喺屋企橫衝直撞，搞到個喇叭傷痕壘壘，原本諗住黎覆診就換返個新喇叭冇咁核突，但諗諗下都係用返原本果個，等醫生同姑娘睇下小me嘅「戰蹟」。

今日周醫生好忙呀，等下等下，診所越黎越多人，卒之到3:30pm先輪到我咋。入到去診症室，周醫生第一時間幫佢除左個喇叭，話佢可以唔使戴喇！跟住就幫佢拆埋縫細眼仔果條線同檢查眼仔。周醫生又話小me醜樣左喇，同細個果時唔同晒（佢次次都話小me醜左架），仲話小me個嘴唇厚添，我問：「係咪好性感呢？」

醫生話佢手術傷口埋得幾好，不過角膜上面就有D疤痕，醫生建議過一兩個星期再黎幫佢拆角膜果D線（又要麻醉喇），亦都可以選擇唔拆，但就要好一段時間D線先會分解，到時D疤痕會多好多。所以我就Book左兩個星期後黎拆線喇。

不過其實小me隻眼仔都好得七七八八架喇，醫生話就算佢R隻眼仔都唔會整返爆個傷口，所以我都放心好多喇。佢依家補返果個角膜仲係紅色架（好似肉咁），醫生話大約要半年時間先會變返透明架，所以依家你地見到小me隻眼唔好笑佢醜怪呀，我地會慢慢變返靚女架喇。

睇完醫生又去左行犬工房，入面D店員姐姐爭住抱小me又同佢影相，我叫佢地記得要影得小me隻眼仔靚D喎。今次買左條同Gucci有99.9%相似嘅頸帶俾小me，當係慶祝佢拆喇叭啦。之後去埋寵物城買左個袋俾佢地，因為佢同Muffin都大個左好多喇，之前D袋都唔岩用咯，所以咪又要買新袋囉。喺寵物城見到兩個隻八哥，其中一隻仲要都係黑豬豬黎架，不過佢主人個樣好似唔係咁nice，所以我都唔敢同佢傾偈....但係果個黑八哥仔仔好可愛架！

返到屋企，Muffin好似冇咁驚解除左裝甲嘅小me喇，哈哈！見到小me終於可以自由自在咁玩玩具咬骨骨、同埋R佢想R左好耐嘅耳背，真係好開心呀。

↑Muffin都仲係怕左個妹架

↑拆左縫細眼仔果條線，即刻精靈返晒呀

↑頭先睇醫生等左咁耐，依家好想覺覺豬哦

↑好明顯睇到角膜上面有少少凹凸不平嘅疤痕，如果第日唔去拆線嘅話疤痕會再多D架。

為左我嘅美貌著想，過多兩個星期我又要去拆線喇