今日係復活節假期開始，亦都係2M（Muffin同Mini me）7個月大生日，點知今朝第一件事就係同小me去睇醫生
。事緣尋晚返到屋企，見到小me隻左眼紅左，細心D一睇，哎吔......隻眼珠仔矇左
！好擔心，唔知佢隻眼仔係咪好似皮蛋之前咁因為睫毛倒生而潰瘍、定係佢地玩得太癲而整親......
。事緣尋晚返到屋企，見到小me隻左眼紅左，細心D一睇，哎吔......隻眼珠仔矇左！好擔心，唔知佢隻眼仔係咪好似皮蛋之前咁因為睫毛倒生而潰瘍、定係佢地玩得太癲而整親......
太平道診所早上10點先開，但係我太心急，9點開始打左幾次去，打到9:45am終於有人聽。不過book唔到我睇開嘅周醫生同Elaine醫生，但都是但啦，最緊要有得睇麻。不過約好後，我都打埋去Dr.Tint果度試下約唔約到Tint醫生，點知姑娘話佢下星期三先會返。
到左診所，姑娘都認得小me，其中一個姑娘問我：「你睇唔睇周醫生呀？周醫生睇眼架麻。」我緊係即刻話好啦，一來小me睇開周醫生，二來佢係眼科麻，只係電話預約果時話今日周醫生冇位之麻。姑娘又問話：「不過周醫生診金收四百，你知架喇呵？」我答冇所謂，不過心諗：周醫生未收過我四百蚊診金喎，唔通睇眼係專科，所以要收貴D？
周醫生話小me可能係玩果時唔小心整到眼仔，個角膜中間穿左個小窿，不過唔算太嚴重，可以靠滴眼藥水同食藥黎醫治，大約7至10日就可以好返。醫生仲建議可以幫佢做個小手術縫埋隻眼，等佢眼仔可以有多D保護，但係我唔想小me又麻醉，加上我放五日假，都可以有充足時間照顧到佢，所以我就冇選擇幫佢做手術。
約左星期一覆診，新手姑娘問舊姑娘：「下？又插周醫生呀？」噢，原來我今日係插左周醫生隊架？同埋原來星期一周醫生又full左，我又再插隊......hehe......真係唔該晒周醫生呀。不過周醫生幾鍚小me架，小me細個果時都係周醫生幫佢做手術架。
返到屋企餵左小me食藥同滴眼仔，眼仔一日要滴6-8次，真係好彩我放假咋。小me戴左喇叭好唔開心，好似冇晒自信咁，所以我只係唔得閒睇住佢果時先幫佢戴，同埋.....八哥戴喇叭嘅問題係飲唔到水同食唔到野呀......
快D好返呀小me！唔好成日要婆婆擔心啦......
左眼仔眼珠白矇左，醫生話係因為佢角膜穿左窿仔，所以D淚水入左去而白左，好返就冇事架喇