其實小me除左果度腫左之外，其他都一切正常架，又食得又玩得，所以我地先以為腫係正常嘅...
今朝9:30am診所就打俾我，話傷口埋左係應該平嘅，如果佢腫起左就要俾醫生睇下，於是我地就即刻帶小me去診所（又係你呀小me）。個傻豬豬以為帶佢去街街，都不知幾咁開心，當同佢去到診所，佢仲周圍望，好似唔相信我地又帶返佢黎診所咁（小me：下，乜唔係去街街咩？點解又係黎依度架？）
Elain醫生見到佢傷口個位咁腫，話佢係入面爆左線呀，要再幫佢縫返好佢....唉......又要麻醉多一次喇.......可能小me真係太過太過活躍啦，所以咪搞到入面爆左線囉。醫生安排佢大約1pm做手術，話5至6pm可以黎接返佢。小me可能知道又要留佢喺度，所以扭計仔要我抱呀，小me乖乖啦，婆婆好快黎接返你架喇。等緊俾按金期間周醫生見到我地，佢就問Mini me做乜呀？（點解周醫生會估中又係小me嘅？）我地話俾佢知絕育手術個傷口爆左線，周醫生話：「哦，好小事姐，唔使擔心。」周醫生真係好呀，次次都可以令人安心好多架。
3點幾診所就打黎話可以接返小me喇（咁快嘅？），去到診所接返小me，佢今次好精神呀，一D都唔似麻醉過咁，可能真係習慣左麻醉啦。姑娘話頭先小me猛咁扭計仔呀，真係傻豬仔。等緊見Elain醫生果時又見到周醫生，佢都忍唔住話小me依個小朋友真係多災多難（佢仲順便睇下小me隻眼仔，話佢眼仔個傷口好靚，有部份已經變返透明喇）。啋啋....小me以後就會苦盡甘來，健健康康架喇。
Elain醫生話小me入面爆左線，流左D肥膏出黎（下？！），已經幫佢抽走左D唔好嘅組織，冇事架喇，不過今次係要拆線嘅，10-14日後返黎拆線，依5日都唔好俾佢咁大動作。我地約左下星期日返診所拆線，而依5日小me就要過鐵窗生活，冇辦法啦，邊個叫你真係過份地活潑丫。以後乖乖喇，一個月大就做隆胸.....家下仲抽埋脂添，你好可愛好完美架喇，唔好再要公公婆婆帶你黎診所啦。
↑鐵窗生涯Day1
沒有留言:
發佈留言