小me眼角膜穿左個窿仔，原本以為滴眼藥水同食藥可以痊癒。4月9號（星期一）覆診時醫生都話佢個窿淺左，但覆診之後果幾日我又覺得佢多左眼水分泌、眼白紅左同埋佢成日咪埋隻左眼
。好擔心佢眼仔情況係咪差左，所以原本星期六先覆診，我4月12日（星期四）急不及待請假帶佢去睇醫生。不過果日周醫生放假，所以就睇以前睇開嘅Elain醫生。
去到診所，D姑娘都覺得小me眼仔差左......Elain醫生都認為佢嚴重左，但由於之前唔係佢跟開，所以佢唔肯定之前情況係點，結果唯有再約翌日睇返周醫生。
4月13日10:45am去見周醫生，醫生話小me眼角膜個窿深左，就黎穿.....
原因有兩個：1. 眼仔有太多細菌侵蝕佢個傷口。 2.自己體內嘅抗體清理緊壞死左嘅細胞，但同時都清理埋好嘅細胞。不過無論原因係咩，都要同佢做手術修補返個窿仔。
周醫生建議同小me做一個最唔影響佢日後外觀嘅手術，就係喺佢個窿仔上面切一塊長方形嘅角膜（由眼白至窿仔上面），向下移落去補返個窿。由於用自己嘅角膜，
所以假以時日就會慢慢變返透明，不過就會喺眼珠隱約見到原本框住眼珠果一段黑線（因為果一段移落左）。周醫生話：「不過佢咁黑，唔覺眼嘅
。」
依個手術費用大約係$7500，另一個平D嘅手術就係用佢眼則邊一小忽肉補落個窿度，但永遠都會見到補返果個位係紅色嘅，手術費大約$5000。我決定做$7500果個手術，只要我能力做到，我都要俾最好嘅野佢
。
周醫生話今日都幾多手術要做，所以小me嘅手術會喺旁晚進行，可能要留院一晚。因為我都預計小me可能要做手術，所以冇俾早餐佢食，依家要到差唔多6點先做手術，好驚餓親佢
，所以我即刻問醫生使唔使俾D野佢食下先，不過醫生話佢咁肥，餓一陣唔怕啦......
跟住姑娘就抱左小me上二樓等做手術，我就返工等醫生做完手術打電話俾我。
好緊張好擔心，不過我對周醫生好有信心，但小me咁細個又要做第二次手術，好心疼
。加上佢果時得一個月大就話咩都唔識，但依家7個月大，佢實以為我地唔要佢而好唔開心喇......嗚......
周醫生6點半打俾我：「手術好成功，不過麻醉藥未過，小me仲係未清醒晒，所以最好今晚留院，等佢可以好好訓一覺。」診所晚上探病時間係9點半至10點半，我9點半去到而CEO就遲少少黎。第一眼見到小me真係勁心痛
，因為佢冇晒心機呆下呆下咁，我叫佢都冇反應。跟住我打開個籠門再叫下佢同摸佢，佢先知係我黎左探佢，即刻清醒晒仲猛扭計仔
。見到佢隻左眼做完手術要暫時縫埋一半，又戴住個喇叭食唔到野（醫生放低左一小碟雞肉俾佢），好心疼......
於是我就撕D雞肉俾佢食，唔知佢係肚仔餓定係第一次食雞肉，佢好好胃口，好快就食晒
。
CEO同我不斷摸下佢又同佢傾偈，希望令佢冇咁怕怕。我不斷同小me講：「婆婆聽朝10點就黎接你返屋企架喇，小me快D訓覺，訓醒就見到婆婆喇。」
10:15pm我地閘返個籠，不斷喺佢左左右右咁行黎行去，又同佢玩下Hide & seek，等佢唔知我地幾時走。
第二朝（4月14日）我特登早少少起身拖乾淨個地，就去診所接小me。小me一見周到我就即刻要抱抱，仲猛扭計仔好似訴苦咁
。醫生話個手術好成功，個角膜修補得好靚，不過好返後個角膜都會有少少疤痕，但會隨時間而淡D唔顯眼
。之後要食藥（抗生素同消腫止痛藥）同埋滴眼藥水，星期六再黎覆診。
同小me搭的士返屋企果時同司機傾偈，司機知道小me做完手術，問我依家D八哥賣幾錢，我答本地繁殖大約三千幾啦。佢話：「嘩！咁條數好唔岩喎，佢身價三千幾，但做手術就七千幾，都唔岩比例！有咩理由收咁多架？！」我無言，因為我從來冇諗過「條數點計」，生命邊有得計架
？唔通倉鼠值$20，手術費就收五蚊咩？我答司機：「我當佢地係自己仔女。」
返到屋企，小me好開心，一家人又聞黎聞去，我就望實怕佢地玩得太癲會整親。我見小me飲唔到水，怕佢麻醉後會好口渴，所以除左個喇叭諗住等佢飲完水先戴返。點知小me抓左兩下眼仔，喝都喝唔住
！一望佢，成隻左眼都係血
！我好驚，即刻幫佢戴返喇叭同打電話去診所搵周醫生，但周醫生要睇埋個症先可以覆我。我一路喊，一路抱住小me出門口，搭的士返診所。好驚好驚，好驚小me又要做多一次手術令佢痛多一次
，覺得好對唔住小me同周醫生......
去到診所，姑娘見我喊到豬頭咁，好緊張咁問小me做咩事。我一邊話俾佢地知，一邊又忍唔住喊......
其他喺診所入面嘅顧客都好擔心咁望住我，姑娘話等周醫生睇完依個症就即刻見我。一見到周醫生我就同佢講對唔住，因為我覺得佢咁俾心機幫小me做手術，就俾我依個白痴糟蹋左
！周醫生幫小me檢查完，話小me只係整損左眼皮，冇整親入面個傷口，唔使擔心
。我個心先定返咋
。
出返Reception，姑娘知道小me冇事都好開心，在座嘅顧客都面露笑容
。其一中位嬸嬸叫我：「唔好再幫佢除喇叭咯，頭先見你入黎果時嚇到面都青埋呀。」直至小me好返為止，打死我都唔敢再幫佢除喇叭咯
！
出左診所，同小me去附近買左個掛籠嘅飲水器（冇錯！我真係白痴，因為屋企用水兜所以佢飲唔到水，依家先諗到可以買個飲水器俾佢
）。再次同小me返屋企，因為屋企冇籠，所以暫時要拎住個水樽俾佢飲。餵埋佢食野，看住佢地玩，跟住就同小me一齊上床訓晏訓。晚上返娘家扲返個籠返黎，裝好個飲水器，小me好鍾意去飲水，Muffin都係
，小me見哥哥飲自己個水樽，會去撞開哥哥然後自己去飲
，正一霸皇妹！
臨訓前抱小me入籠，雖然唔忍心，但冇辦法啦，萬一訓訓下佢地玩或者有咩意外整親隻眼仔點算？所以直至小me好返為止，訓覺同埋冇人喺屋企都只有放佢入籠。陰功豬，佢同Muffin咁大個都未困過籠架麻
......
所以小me你要快D好返，咁就可以自由自在咁食玩訓喇
！
：訓喺床睇電視、攤喺床打機、坐喺床食杯麵
......日本有御宅族，香港有我依個「御床族」
。
。
！有冇人要買懶呀？我有好多呀
。去到診所，經過我上星期「喊爆診所」一役後，D姑娘好似更認得我
......唔......不過佢地個個都真係好關心小me，真係好感謝佢地
。依家約左5月5號去覆診，希望到時可以拆線啦
，唯有下次覆診果時再去攞啦。仲有，小me又喺間舖度，望住塊落地鏡吠自己喇
