La vie est belle: 2007/06

6.30.2007

瘋雨不改708

嗚嗚.........由於太陽伯伯偷懶嘅關係，我地怕佢聽日都罷工，所以原定聽日嘅BBQ派對，我地將會

改為下個星期日（7月8日），地點依然係Pet World，相信太陽伯伯今個星期唞夠，下星期就會雨過天青架喇。而由於改左期，所以原本7.01黎唔到嘅朋友仔，唔知7.08你地得唔得閒呢？

p.s.因為要改期，如果有令各位朋友仔唔方便嘅地方，真係好對不起呀

改期後仍然黎到一齊癲嘅朋友仔：（7.7.2007 updated）

Yonnie..........5人+金叮、金喜、金旺、茄汁

Peggy...........2人+Charcoal、皮蛋、Muffin、小me

屎笨沙...........2人+鬼仔B

Ada..............1人+Bobby/小白？（帶晒？）

Dick媽..........2人+黎的‧黎麥麥

傻兜嘜吱........2人+傻兜、嘜吱

MOBY...........3人+Moby、Toby

Wing............3人+肥豬、阿Bo

Maggie.........2人+咸蛋

糖媽.............1人+拖肥糖

淡普洱..........2人+Money

肥吉.............2人+吉仔

Iris...............3人+小嬌

Stella...........1人

Total 31人+23狗狗

6.29.2007

Charcoal 3歲喇

今日（6月28日）係Charcoal 3歲生日呀，所以特登整左餐好野俾佢食（另外三個都梗係有份啦），其實只不過係南瓜雞肉同埋吞拿魚脆肉瓜沙律咋，不過對於家政考尾二嘅我黎講，係我能夠整到最正嘅食物黎架喇，希望四寶鍾意食啦。一開始佢地都唔知我整野俾佢地食，後來到D食物開始煮熟發出香味，最細果兩個就開始緊張喇；到搞掂晒要放涼D食物果時，Charcoal鬧我呀，佢催我話我手腳慢呀......

↑話明係南瓜雞肉同埋吞拿魚脆肉瓜沙律，材料就緊係南瓜雞肉同埋吞拿魚脆肉瓜啦

↑蒸好晒喇，不過要攤凍先可以食架

↑登登登~~~顏色同賣相都唔錯卦？得喇得喇，你地幾個唔好催我啦

由於晚上屋企嘅燈光太柔和喇，所以我用左黃加胃後現代鬆郁朦攝影手法黎影佢地.......em......

↑小me（前）：點呀？有得食未呀？餓死人咩！唔識整就一早叫外賣啦

↑Charcoal（後）：......整咁耐，唔好食嘅話我實鬧你架

↑Charcoal：習習習.....OK啦......習習.......都幾好味......習習習......

↑好少食野食得咁快嘅Muffin
↑9秒9食完成兜好野嘅皮蛋

而由於小me全程係冇停過咁一路食一路郁，食完自己果兜又行黎行去，睇下人地果兜仲有冇淨
.....所以我係影唔到佢架

6.27.2007

各位朋友仔，黎緊7月1號除左係回歸10周年之外，記唔記得仲有咩大事將會發生呢？冇錯，我地果日係要去Charcoal、金叮、金喜同金旺小朋友嘅生日派對呀。各位朋友仔千祈唔好唔記得左我地嘅約會呀~~~果日我地大約12點會去到Petworld等候你地大駕光臨架，黎到就可以BBQ架喇，到人齊晒又燒到熱辣辣（maybe 兩點零三點咁上下，可以到時先決定），我地就可以一齊去游水水，正呀！游完又可以再黎BB蕉~~~一於玩盡佢~~hahaha

有咩問題歡迎隨時問我架，我地有78條線接聽你地嘅電話架~~~

↑Charcoal & 小me：我地厚唇孖寶約定你地架喇~~~

↑Muffin：我果日襯咩衫好呢？（少男的煩惱.....）

↑小me：希望果日大家多D留意我內在嘅一面，而唔好只係掛住望我個豬唇啦......

（少女的煩惱.....）

↑Muffin：我要練定點扮壽包，到時氹媽咪、金叮姐姐同金喜金旺哥哥開心

到時會黎一齊癲嘅朋友仔：（276.2007 updated）

Yonnie..........5人+金叮、金喜、金旺、茄汁

Peggy...........2人+Charcoal、皮蛋、Muffin、小me

屎笨沙...........2人+鬼仔B

糖媽..............1人+feefee

Ada..............2人+Bobby、北京狗狗

Dick媽..........1人+黎的

傻兜嘜吱........2人+傻兜、嘜吱

Wing............4人+肥豬、阿Bo

花生媽...........1人+芳芳

Moby.............3人+Moby、Toby

Cat................1人+Dabbie、瑤瑤

Mandy...........2人+B仔

Total 26人+23個寶寶~~Yeah

6.19.2007

616 feefee Birthday Party

616係feefee生日會嘅大日子，今次有份參加生日會嘅幸運兒就係Charcoal同小me喇。今日有好多朋友仔呀，Charcoal同小me兩母女不知幾開心.....因為.......佢地呃到好多零食呀。

↑高貴版米妮芳芳鼠

↑一班饑民........見到有野食即刻兩眼發光

↑金叮、豬妹：俾我食啦~~~~求下你俾我啦

↑意圖拐走壽星仔feefee嘅犯人甲
（拐子婆點錯相.........圖中果位唔係feefee....而係樂少）

↑飛飛：你個肚咁圓，一定係收埋左好多野食架嘞！

↑Charcoal：你唔好打我主意呀下

↑肥嘟嘟飛飛，果日成日扮乳豬仔

↑豬妹：hehehe....heehehee......（傻笑中）

↑我地一班小朋友好乖架，我地會好守秩序咁排隊架.........之但係.....我地其實排緊D咩呢？

↑除左識排隊，我地仲會玩下氹氹轉添

↑金叮：我又開始想訓覺覺豬喇........zzZZ

↑feefee：媽咪！唔制呀！點解依兩條友仔都有份吹爉燭架！？

↑金叮：乜今日唔係黎慶祝我生日咩？

↑Charcoal：唏~~~話晒大家都係6月之星，借黎叨下光之麻。

唔好講咁多，快D吹熄佢就可以食架喇

↑你地D大人影完未呀？依度好迫呀~~~~

↑Charcoal：阿女，我地身為美少女，就梗係多人影架喇。

你要對鏡頭敏感D先得架，對住鏡頭笑下啦

↑小me：媽咪......不如你望吓下面先啦.......

↑小me：媽咪，我地俾人擺左上枱，我愁緊點落返地地呀......

↑Charcoal：下！乜依度咁高嘅！？

6.13.2007

7.01 BB蕉樂游游生日派對

各位朋友仔，黎緊6月28日係Charcoal、金叮、金喜同金旺小朋友嘅生日，所以我地諗住喺7月1日去Pet World搞一個BBQ+游水水生日會，我地好希望好希望你地可以黎同我地一齊玩一齊癲呀！

Pet World可以由11am玩到6pm，如果想早D黎玩嘅朋友仔可以早D黎架（唔好蝕俾佢麻），而如果覺得太早，晏D都冇所謂架（不過都唔好太晏囉，因為我地仲要一齊游水水架麻

，1pm OK嗎？）

希望各位有意黎同我地一齊玩嘅朋友仔，喺今個星期五前覆我地，因為我地要星期五前confirm Pet World哦

至於Pet World收費如下：

狗狗入場費$30一隻（原本$40架，多得金叮媽為我地bargin到每隻平$10蚊）

狗狗游水$40/45mins（游泳費用送自助沖身1次、毛巾1條及吹毛風機）（金叮媽又為我地爭取到由$50變$40喇）

至於人呢，入場係免費嘅（一隻狗狗可以帶三個人），我地諗住BBQ，果D「超值套餐」有分6位同12位，我地會視乎人數而睇下叫咩份量，大約$60一個人。即係如果以一人一狗計，每人大約$130

如乘坐公共交通工具到寵物樂園，請參照以下途徑：
西鐵

錦上路站落車
再乘搭計程車（到寵物樂園大約$20車費）

巴士
可乘坐 968號到元朗（由香港區出發）或
可乘坐 268B / 268C / 68X號到元朗（由觀塘 / 尖沙咀 / 旺角出發）或
可乘坐 64K / 268D / 276P號到元朗（由大埔 / 沙田 / 上水出發）或
再乘搭計程車（到寵物樂園大約$ 30 - $40車費）