La vie est belle: 2007/08

8.26.2007

825勇闖柏麗灣+皮蛋生日

上星期因為CEO腸胃炎，所以冇去到寵物宅嘅疤疤派對，所以今個星期六就同Stella、Moby一家、糖媽同肥吉一家去左栢麗灣游水水。今日亦都係皮蛋嘅兩歳生日，原本我係諗住帶皮蛋同小me一齊去玩架，但一來阿蛋少一朝早就黎大搗亂，二來我好怕自己睇唔住兩個寶寶，始終係去沙灘游水麻，萬一兩個一齊跌落水，我救邊個先呢？（好老套嘅問題）......所以....我只係帶左小me出席咋。

↑肥妹：各位團友，依度就係栢麗灣喇，跟住我行落去就會見到沙灘架喇

↑小me：D水水涼浸浸好舒服呀

↑小me：原來沙灘好好玩架，不過我食左幾個浪，所以都係唔敢行咁出喇

↑hahaaha，做乜小me咁驚肥吉嘅？吉仔，唔該晒你幫我嚇下依個小霸王呀

↑（熟悉嘅畫面）Feefee：家姐....我真係會好好咁對肥妹架，求下你信我啦

↑女鬼造型嘅Toby大佬

↑小me：各位唔好誤會....我係跑緊，唔係大便

↑著住救生衣嘅小me，個樣幾咁認真！

↑狠心將肥妹變成咁嘅樣嘅兇手唔係我，而係佢嘅親家姐呀

原來大家諗住今日為皮蛋慶祝生日，我竟然冇帶皮蛋黎添.....多謝你地嘅禮物呀，仲好多謝Joey嘅生日蛋糕，真係好多謝你地呀（內疚中....）

↑個蛋糕好靚呀，仲好好好好味添，多謝Joey

↑Feefee：我今日除左要保護依個蛋糕之外，仲有一個好重要嘅任務架

↑Feefee：登登登~~~就係代皮蛋切蛋糕喇

↑小me（疑惑中）：Feefee哥哥邊忽似皮蛋舅父呢？

↑我：皮蛋生日快樂！你睇下，Joey姐姐請你食蛋糕呀

↑皮蛋：係咪真架？係咪全個俾晒我呀？係咪唔使分俾佢地三個呀？

↑皮蛋：媽咪！有人偷食左我個蛋糕呀！

↑我：唔係呀，頭先同D朋友仔分左黎食麻，多D人一齊食係咪好開心呢

？同埋影完相要分埋俾Charcoal佢地食架喎

。

↑皮蛋：..........

被Moby媽選中喇，哈哈。我會好俾心機答晒D問題架喇。

遊戲規則如下:A.　必須點名至少8個人，要用盡辦法通知各人參與這個遊戲，人數不夠的話就少點，2個以上就行。
B.　被點名的人不可重複被點，每個人只可玩一次。
C.　回答問題當中時，需自行刪除一個不喜歡的問題，更換一個新的問題，然後點名其他人來玩...
如此延續這個遊戲。
D.　答案需在各自的blog內公佈。

開始遊戲:

1. 如果30歲還嫁不出（娶不到）你會怎樣？ ------> 去打Botox
2. 如果有機會可以讓你重回一個時間，你會選擇回到那個時間？ ------> 兩歳前，因為兩歳前做過咩都唔記得晒咯3. 你希望在別人眼中是怎樣的人？ --------> 快樂而又能帶俾別人快樂嘅人
4. 如果唔駛返學/返工你會點呢？---------> 訓喺床煲電視劇
5. 如果中500萬獎金，你會怎麼花？-------->買一幢有泳池嘅屋，可以俾狗狗水
6. 你最怕的事情？-------> 小強 / 蝴蝶跟住我
7. 你覺得邊件事係令你最難忘既？---------> Charcoal生BB8. 去過既地方中，最喜歡什麼地方？-------> 馬爾代夫
9. 你能放下現在的生活，去鄉村或其他城市重新開始嗎？---------> 好呀，好怕香港嘅節奏，如果可以慢D就好喇
10. 最愛的食物？-------> 凍海鮮
11. 最愛的顏色？---------> 紫色
12. 最愛的休閒？---------> 同四寶一齊訓晏覺
13. 興趣是甚麼？---------> 畫奇怪公仔，買狗仔野，行街
14. 現在最想做的事？-----------> 整返好架衣車
15. 最愛的口頭蟬？--------> 「點解嘅？」
16. 做最蠢的事？---------> 同朋友早左好多入機場禁區，但大家掛住玩，所以送機尾.....要加錢搭下班機
17. 最憎的季節？--------> 春天（太潮濕喇）
18. 最了解我的人？-------> 自己
19. 最愛的節日？-------> 聖誕節，Yeah
20. 最想見的人？------> 失散多年嘅幼稚園同學 ---- 余瑞玉
21. 愛的定義？----------> 包容，體諒，信任，快樂
22. 心中嘅目標？--------> 可以同四寶一齊住喺一個有大草園嘅地方
23. 希望自己擁有甚麼才能？--------> 能操多國語言
24. 最喜歡的地方？----------> 家
25. 當你好沮喪的時候，你會選擇做D咩？--------> 「呢」埋喊

各位朋友仔，我選左你地一齊玩呀，呵呵呵（希望唔好介意）
心心，媽媽芝，樂樂，妹梅，Bread，粉果靚靚，汶汶，KitKit，寶仔，KK

8.05.2007

出獄後的日子

↑CEO：你兩個奀皮四依家知錯未？

大家係咪奇怪因乜解究Muffin同小me會俾CEO鬧鬧呢？以下果幅圖可以好清楚咁解釋到原因.....

你兩條友仔係咪想作反丫？定係吼我地唔喺屋企就開個出獄趴地呀？原本諗住聽日（星期日）帶小me入屯門同我D表弟妹玩架麻，依家你係咪唔想去丫？

↑小me（懶可愛地）：婆婆，你又話今日帶我去街街嘅？

↑我：係喇係喇，我講過實算數嘅....

同小me入到屯門婆婆家（即係小me嘅太太婆），我地係一個大家庭，每個月都總有一兩次要入屯門食飯。我D表弟妹都好鍾意小me（Charcoal已經變成第二位...），我同佢地解釋小me做完手術，所以唔好蝦佢呀，所以今次佢地都只係好乖咁摸摸小me，冇好次上次咁，不斷叫小me：「mimemimemimemimemimemime...come！mimemimemimemimemime.....sit！」（上次不斷 mimemimemime....我覺得佢地好似落緊咒語咁。）不過佢地不斷追住小me要摸摸，所以小me成日兜路避開佢地，我諗佢同Charcoal一樣，都係唔鍾意同細路仔玩。

↑小me：婆婆，我唔鍾意同細路仔玩呀，下次入屯門你都係帶媽咪黎啦

↑小me：小表哥，你係咪收埋左隻雞脾喺條褲入面！？

↑都係公公抱住安全D

-------------------------------------------------------------------------------------------------唔知點解小me依家11個大，但都仲係好鍾意飲Charcoal D奶奶之（Charcoal冇奶奶好耐喇），所以佢做完手術咪買左罐奶粉俾佢飲，諗住一慰佢對奶奶嘅相思之苦啦，點知好似反而加劇左小me對奶奶嘅慾望，追住Charcoal奶之嘅次數仲有增無減！Charcoal.....我對你唔住呀....

8.01.2007

同曳線線講bye-bye

好野，今日約左Elain醫生2:30pm拆走條衰線線。不過我地好早就起左身，所以食飽早餐玩左一陣，我地就訓晏覺黎消磨上午嘅時間。

↑小me：hehehe~~~聽講我一陣就可以同條衰線線講bye-bye，即係話呢，我可以出獄喇

↑小me訓喺公公臂彎個樣幾冧

↑小me：看出一點真，看出可觀人生

訓訓下晏訓，望下個鐘，嘩，乜訓到1:30pm嗱？即刻起身準備出門口先得。

↑小me：好野，有得去街街！我自己落地地行得唔得呀？

↑到左診所，乖乖地坐喺度等醫生叫我地入去

小me坐左喺reception同接待姐姐玩左一陣，清潔嬸嬸經過見到小me，估唔到連清潔嬸嬸都識得佢，嬸嬸同小me講：「哈哈，乜又係你呀？」跟住周醫生返黎見到小me，同小me玩左一陣就話：「以後都唔使做手術架喇。」梗係啦梗係啦。等左一陣就到我地喇，Elain醫生檢查下佢個肚仔，跟住就幫小me拆線線喇。醫生話佢個傷口埋晒架喇，隨時可以洗白白同落街街咯。