La vie est belle: 當年‧今日

一直都仲未喺度介紹下我果四粒寶貝，就等我今日為大家揭開佢地神秘嘅面紗啦。

首先上碟嘅係我大囡Charcoal，生於2004年6月28日地球某個角落。喺一個月黑風高嘅晚上，我同佢邂逅於旺角嘅一間黑店（冇錯....天真嘅我當時完全唔知係一間黑到冇人有嘅黑店）果時佢兩個月大，細細粒好乖巧。但原來佢乖係有原因架，我地第二日帶佢去診所做身體檢查，證實佢有狗瘟！果時好驚好驚，好驚會失去佢，但從來冇諗過拎返寵物店換過另一個，我只係要Charcoal咋。不過Charcoal佢好叻叻，大約兩三個星期後佢就差唔多好返晒喇，所以四個之中我最錫同最珍惜就係佢。

Charcoal花名「肥B」，佢好精架，學咩都好快上手，但除非有著數，否則佢係識都會扮唔識架（甚至扮聽唔到）

↑三個月大嘅Charcoal，當時大病初癒，所以仲係排骨豬一名。

↑今時今日嘅Charcoal，一個字：圓！

第二道菜就係皮蛋嘞。皮蛋出生於2005年8月25日元朗某個家庭，佢親生媽媽阿Belle都係大件一族黎架。喺皮蛋四個月大時我地帶埋Charcoal去佢屋企睇下兩個小朋友夾唔夾，皮蛋非常熱情活潑，仲不斷喺梳化跳黎跳去想同Charcoal玩添，不過Charcoal就冇乜理佢，但亦都冇話唔鍾意皮蛋囉。於是，皮蛋就成為左我地其中一個家庭成員嘞。

皮蛋花名「肥仔」，佢係好易肥架，不過依家成功減左磅，要努力Keep住喇。佢天生右手戴左隻白手襪，可能之前係做waiter架。

↑四個月大嘅皮蛋，身型已經同當時歲半嘅Charcoal差唔多，不過都仲係細細粒，超級BB樣

↑今日嘅皮蛋，眼細脷長係佢嘅Trademark

再黎嘅係Muffin同埋Mini me，佢地生於2006年9月5日，兩個都係Charcoal嘅親生骨肉。本來應該有多個哥哥架，可惜哥哥太大隻，塞住左產道令到Charcoal要剖腹生產，但哥哥可能缺氧太耐，所以救唔返咯。當時真係好驚架，我預左冇晒D BB架喇，但Charcoal千忻唔好有事呀！

Muffin 同Mini me都好叻叻，佢兩個好順利咁黎到依個世界，生命真係好奇妙好神聖！不過Mini me約十日大時成日飲奶都「濁」親，睇左幾次醫生，發現佢原來係先天性胸骨扁平。果時佢因為「濁」奶，所以要每兩小時人手用針筒餵佢飲奶，好脆弱嘅生命....好怕自己做得唔好而失去左佢，Mini me三個多星期大就去做一個擴大佢胸骨嘅手術，好彩手術好成功，多謝周醫生幫Mini me做依個手術，令佢可以擁有一個正常嘅童年。手術後Mini me要戴住個胸模一段時間，果陣Muffin成日蝦妹妹架，Mini me一俾佢反轉就好難自己反返起身。可能Mini me好記得果段俾人恰嘅日子啦，所以當佢拆左果個模之後，佢變左牛皇妹.....成日蝦哥哥！Muffin哥哥自此變左鵪鶉，成日俾妹妹蝦返轉頭，真係因果循環....善哉善哉。

Muffin花名「finfin豬」，成日嗲聲嗲氣，俾妹妹蝦都唔會反抗。唔知點解對腳愈黎愈長，同Mini me一D都唔似同胎兄妹。

Mini me花名「小me」「豬咪咪」，典型牛皇頭，天不怕地不怕，最鍾意咬尾咬腳，持住自己細粒同埋做過兩次手術，可憐死光成功攻陷左我地嘅心，更加惡上加惡。