覆診

今日晨早9:45am帶小me去覆診，佢依兩次搭的士去診所都扭計（回程佢冇嘈過架喎），唔通佢真係知道我係同佢去睇醫生？

去到診所，其中兩位認得小me嘅姑娘話小me大個左好多，姑娘話：「果時佢仲喺個氧氣箱度爬下爬下。」haha，緊係大個左啦，果時小me得三、四星期大，依家七個月大喇！

到我地入去醫生房喇，周醫生檢查左一輪，話佢個窿雖然仲係大，但係就淺左，要繼續滴眼藥水同食藥，星期六再覆診。今日係假期最後一日喇，聽日唔可以每兩鐘幫佢滴一次眼仔添，不過如果早D起身同夜D訓，都可以幫佢滴到五六次咁上下嘅。

睇完醫生，抱住小me去左犬工房shopping。死啦，我依家買自己野就唔捨得，但買佢地D野呢......買左一條胸帶俾Charcoal，再加四個狗牌，折實價承惠$718......算啦.....必需品黎嘅......（但其實我只係諗住買多個糧兜俾佢地，反而正經野買唔到）

小me喺舖頭果時勁搞笑，佢行左埋塊落地鏡果度又要望又要緊張（佢未照過鏡），望望下見到自己，佢嚇到退後，跟手就吠自己喇。如是者幾次佢都咁，連店員哥哥都忍唔住拍佢movie。到我搞左一輪去俾錢果時，小me又望住塊鏡吠自己喇，店員甲都話乜佢可以玩咁耐，我話：「我今日先知，原來佢係傻架......」