愛與夢飛行

每晚我都會發夢，細個果時晚晚都會喺夢境裡面飛翔，訓醒總希望自己真係擁有飛行能力。人大左，夢中飛行嘅次數減少，訓醒之後反而怕夢境成真——我唔想喺露台飛落街呀！

有時會諗：如果我喺現實中以為自己發緊夢，無啦啦就咁飛左落街點算？咁我使唔使訓覺都著靚D呢？

我諗野嘅方式唔係直線，好多時諗諗下依樣嘅野，又會突然踩行油一個U-turn再加個45度急彎去左諗第二樣野。有時同朋友傾偈，大家明明講緊A，但只要其中一句說話令我聯想到B，我就會講到好離題。我稱之為「思想失控」，不過另一個淺白D嘅說法係「九唔搭八」。

「九唔搭八」都算係我專長之一，我最鍾意諗D九唔搭八嘅野。例如食粥落湯圓、哈蜜瓜炒蛋、先著鞋後著襪等等（諗下啫......）

試過早餐一次過食左兩樣我好鍾意食嘅野：月餅同雪糕，結果屙足一日。我唔信係依兩樣野加埋嘅化學作用，所以第二日照食月餅同雪糕做早餐；原來真係唔可以一齊食架！我真係又屙左一日，仲食左半樽極臭嘅巴巴正露丸......